Pankaj भटकंती Unlimited™

झाला बरं का आमच्या इकडे पण. आमच्या पुण्याचा नंबर पण लागला. मुंबईच्या जखमा वाहत्या आहेत तोच त्या भेकडांनी इकडे वाकडी नजर केलीच. आमची जर्मन बेकरी. देशी-विदेशी नागरिकांचे आवडते ठिकाण. पण पाहवली नाही हो त्यांना. आमच्या आजवर कधीही गालबोट न लागलेल्या पुण्यात थोड्या वेळापूर्वी कोरेगाव पार्क भागातल्या या बेकरीत बॉंबस्फोट घडवून आणला. माहितीची शहानिशा करता करता २-३ तास गेले. गृहराज्यमंत्री टीव्हीवर बाईट देता देता एक पोलीस त्यांच्या कानात काही तरी कुजबुजून सांगतो आणि ते तडक निघून जातात. त्यावरुनच काही तरी अमंगळ आहे याची कुणकुण लागते. काही वेळातच मुख्यमंत्री, केंद्रीय गृहसचिव हा घातपात असल्याची अधिकृत माहिती देतात.

पुण्याच्या नशिबी पण हे असले काही तरी रक्ताळलेले लिहिले असेल याची कल्पना खरे तर हेडलीला पकडले तेव्हाच यायला हवी होती. शिवाय तो राहून गेलेल्या ठिकाणीच आजचा स्फोट झाला. शेजारीच छाबड हाऊस (ज्यू प्रार्थनास्थळ) आहे. ओशो आंतरराष्ट्रीय ध्यान केंद्र आहे. असंख्य परदेशी पर्यटक तिथे वावरत असतात/ मग असे असताना तिथली सुरक्षा एवढी ढिली कशी झाली. मागल्या मार्चमध्ये हेडली पकडला त्यावेळी तिथे नॉर्थ कोरेगाव पार्क मेन रोडवर दोन ठिकाणी पोलीस चेक नाके होते. कालपरत्वे ते गायब झाले. उरले फक्त बॅरिकेड्स. ते पण रस्त्याच्या बाजूला ठेवलेल. का? काही दिवस उलटले की धोका संपतो का?

आता केंद्र शासन म्हणतेय ऑक्टोबरमध्येच हायअलर्ट दिला होता. मग राज्यशासन "नाही" म्हणेल. मग पुन्हा राज्य प्रशासन की केंद्र यावर वाद झडेल. पोलीस दोषी की इंटेलिजन्स. माय नेम इज खान विरुद्ध सेना या आंदोलनात पोलीस व्यग्र होते म्हणून इकडे मोकळे रान मिळाले असेही कुणीतरी नक्की म्हणणार. मिडियावाले उलटसुलट बातम्या पसरवतील. काही अफवा पसरतील. राजकारणी एकमेकांवर चिखलफेक करण्याची एक संधी सोडणार नाहीत. विरोधी पक्ष सत्ताधारी पक्षाला आणि सत्ताधारी विरोधकांच्या आंदोलनाला दोष देत बसणार. ही पोस्ट लिहून होईपर्यंत तर एखादा राजकारणी बरळलाही असेल काहीतरी. किमान यावेळी  तरी (आणि हीच शेवटची वेळ असावीअशी प्रार्थना) मिडियाला नियंत्रित ठेवण्याचे, त्यांना खात्रीशीर बातम्या पुरवण्याची व्यवस्था सरकारने किंवा संबंधित यंत्रणेने राबवावी. नाहीतर पुन्हा ते टीआरपीच्या वेडात काहीही बातम्या दाखवून, आकडे फुगवून, एखाद्याच्या तोंडची वाक्यं हवी तशी एडिट करुन दाखवणार आणि मूळ विषयाकडे दुर्लक्ष होणार. त्यासाठीच सरकार आणि पोलीस यंत्रणा यांच्यात सुसुत्रता ठेवून अधिकृत बातम्या पुरवण्यात याव्यात. राजकारण्यांनी पण जरासा तोंडाला लगाम लावावा. सर्व राजकीय पक्षांनी पुढील एकदोन दिवस आपली असेल नसेल तेवढी यंत्रणा अफवांचे निराकरण करण्यात, जखमींना रक्त आणि इतर मदत मिळवून देण्यात, पोलिसांना सहकार्य करण्यात, वेळ प्रसंगी वाहतूक नियंत्रित करण्यात खर्ची घालावी. आम्ही सामान्य नागरिक यथाशक्ती मदत करुच.

पोलीस नियंत्रण कक्ष दूरध्वनी क्रमांक: ०२०-२६१२२८८०, ०२०-२६१२६२९६

शेवटचे आणि अतिमहत्त्वाचे म्हणजे दाखवून द्या की आम्ही भ्याड नाही. हा हल्ला आम्ही गंभीरपणे घेतला असला तरी आम्ही घाबरलेलो मुळीच नाही. तुम्ही २६-११ ला डोक्यावर प्रहार केला. आज काळजाला भोक पाडलेत. पण हे मराठी काळीज आहे. एक दिवस दाखवून देऊ आम्ही काय चीज आहे ते. सध्या तरी आम्हांला "अमन" पाहिजे.