Showing posts with label स्वप्न. Show all posts
Showing posts with label स्वप्न. Show all posts
असेही एक स्वप्न
एकदा एका माणसाने वाघ पाळला होता. मी तो वाघ पहायला गेलो. त्याची परवानगी घेऊन त्या वाघाला बाहेर फिरायला घेऊन गेलो. बाहेर म्हणजे एकदम बाहेरगावीच. वाघाला घेऊन मी जिथे गेलो ती एक कसलीशी बागसदृश जागा होती. तिथला वाघ हाताळणारा जो एक्सपर्ट मॅन होता तो रविवार असल्यामुळे होता सुट्टीवर. वाघाला मी तसेच सोडले बागेत. पुढे वाघ माझ्यापासून डावीकडे झाडीत गेला आणि थोड्याशा अंतरावर जरासा उंचावर (झाडाची फांदी की असेच काहीसे होते) जाऊन बसला. मी त्याला तसाच सोडून घरात गेलो. आता बागेत घर कुठून आले माहीत नाही, पण होते. थोडेसे खाऊन चक्कर मारायला बाहेर पडलो. बाहेर पडलो ते सरळ एका रेल्वे स्टेशनवर पोचलो. तिथे एकदम कडक सुरक्षा व्यवस्था होती. पोलिसांचा पहाराच. तंबू लावून. बहुतेक अतिरेकी हल्ला नुकताच होऊन गेला होता की होणार असल्याची टिप मिळाली होती. मी काही वेळ तिथेच रेंगाळलो आणि परत घरी आलो. इकडे वाघाने चारपाच जनावरे खाल्ली होती. आता वाघाला फिरवण्याचे लायसन्स माझ्याकडे नसल्यामुळे माझ्यावर पोलिस केस होणार, मला अटक करुन घेऊन जाणार. स्थानिक पोलिस चौकशीला आले. मी मान खाली घालून विचार करतोय की, काहीही बोलण्याआधी वकिलाला फोन करावा का? समोर ते पंचनामा करत असतानाच मला माझ्या मोबाईलवर फोन येतो. कुठलासा +571XX असा काही तरी पाच आकडी नंबर होता. पोलिस पण स्काईप वापरायला लागले की काय असा माझ्या मनात विचार. पलीकडून त्यांचा आवाज, लवकरात लवकर जवळच्या पोलिस ठाण्यात हजर व्हा. मी म्हणालो, "दापोली पोलिस स्टेशन मला जवळ पडेल, तिकडे येतो". माझा एक संधिसाधू नातेवाईक (ज्याने आतापर्यंत आमचा बराच वापर करून घेतलाय) तो म्हणाला, "घेऊन जा त्याला, नियमानेच होणार आता सगळे."
मला दरदरुन घाम फुटला आणि जाग आली. काल रात्री पडलेले हे 'कैच्याकै' स्वप्न. सहसा स्वप्ने लक्षात राहत नाहीत, पण हे तेव्हाच (रात्री अडीच वाजता) मोबाईलच्या नोट्स मध्ये टाईप करुन ठेवलेले. काय निरर्थक स्वप्न होते. नाही? स्वप्नांना काही अर्थ असतो का? असेल तर कुठे वाचायला/पहायला मिळेल? नसेल तर मग रोजच्या जीवनात कधीकधी अशा अनेक गोष्टी घडतात की असे वाटते, अरे, हे तर आधीच घडून गेलंय आपल्याबाबतीत. तुम्हांला असं वाटलंय का कधी? हा वाघ मला प्रत्यक्ष भेटतो की काय पुढील आयुष्यात? भेटलास तर कॅमेरा हाती असताना भेट रे वाघोबा. चांगला शॉट मिळेल म्हणतो.
23:40
Subscribe to:
Posts (Atom)